JANG

jang,
wanci sariak layung

jangjang peuting geus meber

mapag poek anu simpe

hayu jang...

tong kajongjonan
urang kudu mulang

indung hidep geus ngadagoan

jang,

ulah melang jeung hariwang
tong retas pangharepan

isukan srangenge medal

masih aya kasempetan
mapag poe anu panjang

(Mang Tulak)

GUSTI

Gunung bitu

ombak motah

lemah rempag

dunya inggeung

caah rongkah

banjir bandang

manusa taya daya

ku kawasana nu maha kawasa

gusti...

na dampal anjeun abdi sumujud

(Mang Tulak)

KURING ANJEUN JEUNG MANEHNA

manehna,

nu kesang borobosan na nongtorengna panon poe

nu dekil jeung tatambalan na trotoar

namprak ka

nu ngaliwat

anjeun,

nu kaburusan na  rohangan ber-AC

nu luis jeung seungit na meja kerja

namprak ka

nu menta proyek

kuring,

na tengah poe nu diharudum simbut butut

na ranjang reyod

namprak ka

nu jadi kolot

kuring anjeun jeung manehna 

naon bedana?

(Mang Tulak)

PILEULEUYAN

sawahna sumedeng beukah

umyang koneng ngulang katineung

ciwalungan ngalanggeor ngaca herang 

leuweung iuh hejo ngemploh

racetna manuk mapag srangenge

asa kamari...

tapi kiwari...

bakal paanggang

sugan jaga kasorang

patepung deui
ngahiji

pileuleuyan...

(Mang Tulak)